Autor Sindikat medija
SafeJournalists mreža najoštrije osuđuje slučajeve krađe opreme novinarke Žane Karić – Gauk i urednika Eldina Karića u Bosni i Hercegovini i prijetnje novinarima/kama TV SIRI dok su izvještavali sa političkog skupa u Albaniji.
Dok su u subotu, 15. jula, proslavljali 14. godišnjicu portala Žurnal, nepoznata osoba je provalila u stan novinarke spomenutog portala Žane Karić-Gauk i urednika Eldina Karića i ukrala im opremu za rad, odnosno dva računara.
Udruženje BH novinari (BHJA) ocjenjuje ovaj incident kao ciljani pokušaj zastrašivanja novinara/ki i urednika portala Žurnal, kako bi odustali od istraživačkog novinarstva i objavljivanja priča o slučajevima kriminala i korupcije, čiji su akteri najveći političari i državni funkcioneri u Bosni i Hercegovini.
Udruženje je javno pozvalo policiju Kantona Sarajevo da izvrši hitnu istragu u ovom slučaju, kao i da preduzme zakonske mjere za sankcionisanje počinilaca.
Još jedan slučaj dogodio se juče novinarki Marsi Koreši i njenoj ekipi sa TV SIRI koji su dobili ozbiljne prijetnje tokom izvještavanja sa skupa Socijalističke partije u gradu Rogožina, a usred predstojećih lokalnih izbora zakazanih za 23. jul.
Ekipa je izvjestila da su im dvije osobe, identifikovane kao rođaci kandidata Socijalističke partije Edisona Memole prijetile i maltretirale ih. Marsi Koreši i ekipa su uživo iz Rogožine izvještavali o organizovanju ručka za nastavnike, ljekare i druge administrativne radnike/ce od strane kandidata Socijalističke partije, što je čin zabranjen tokom predizborne kampanje. Novinarka je izvjestila da je više osoba, pješice i u vozilima, opkolilo i prijetilo tv ekipi, fizički ih zgrabivši i zahtjevajući da prestanu sa izvještavanjem i napuste prostorije. Prijećeno im je čak i nasilnim izbacivanjem.
Policija Rogožina je odmah reagovala na incident, nakon što je dobila poziv u pomoć od ekipe SIRI TV-a. Policijska služba je posavjetovala ekipu da podnese zvaničnu prijavu, identifikovala je i privela dvije umješane osobe, koje su i stanovnici Rogožine i rođaci kandidata Socijalističke partije, na dalje proceduralne radnje u policijskoj stanici Rogožina.
„Kao direktor SafeJournalists mreže duboko sam zabrinut zbog nedavnih incidenata koji uključuju zastrašivanje i krađu usmjerene na novinare/ke u Bosni i Hercegovini i Albaniji. Ovo nije samo napad na novinare/ke, već napad na demokratiju i pravo na slobodu govora. Da naglasim: Ne možemo dozvoliti da strah i zastrašivanje ometaju našu potragu za istinom. Čvrsto stojimo protiv ovih napada i nastavićemo da težimo ka svijetu u kojem novinari/ke mogu da rade bez straha od odmazde.” – izjavio je Dragan Sekulovski, direktor SafeJournalists mreže.
SafeJournalists mreža, koja predstavlja više od 8.200 medijskih profesionalaca na Zapadnom Balkanu, najoštrije osuđuje svaki vid zastrašivanja novinara/ke, bilo da se radi o provali u stan ili tokom direktnog prenosa. Mreža je zabrinuta zbog ovakve klime koja se stvara prema novinarima/kama i poziva institucije u državama da reaguju na ove slučajeve i pokažu da štite prava novinara/ki, medijskih radnika/ca, te stoga poštuju demokratiju i slobodu govora.
SafeJournalists mreža će obavijestiti relevantne nacionalne i međunarodne zainteresovane strane o ovim slučajevima.
Svaki napad na novinare/ke je napad na javni interes, demokratiju i prava svih građana/ki.
Priština – Skopje – Sarajevo – Zagreb – Beograd – Podgorica, 17.07.2023.
Udruženje novinara Kosova
Udruženje novinara Makedonije
Udruženje BH novinari
Hrvatsko novinarsko društvo
Nezavisno udruženje novinara Srbije
Sindikat medija Crne Gore
